Apoio a pequeno comercio e traballador@s de grandes almacéns

MOCIÓN DO PSdeG-PSOE PARA QUE O CONCELLO DE BARBADÁS MANIFESTE O SEU APOIO E SOLIDARIEDADE COS TRABALLADORES E TRABALLADORAS DO SECTOR DE GRANDES ALMACÉNS E PARA PROTEXER Ó PEQUENO COMERCIO

           

Recentemente foi asinado por dous sindicatos empresariais, concretamente Fetico e  Fasga, o convenio colectivo para os grandes almacéns. Un convenio que non foi respaldado por  ningún dos  sindicatos de clase como son  CC OO, UXT, LAB, CIG e ELA-STV

Trátase dun convenio que terá unhas importantes repercusións nas condicións laborais dos traballadores e traballadoras do sector xa que contempla importantes recortes de dereitos recollidos en acordos anteriores.           

            A merma de dereitos afecta a múltiples aspectos pero no Grupo Municipal Socialista de Barbadás queremos mencionar os máis salientables.

Teoricamente recolle a conxelación de salarios durante 4 anos, pero na realidade esto supón un recorte do soldo debido a que se aumenta a xornada laboral.

Pero ademais, durante a vixencia do convenio  non se ten presente a taxa de inflación prevista que estará perto do 8% de xeito que os traballadores e traballadores terán un salario real moito menor do actual con máis horas de traballo.

Como xa anticipaba antes, a xornada laboral vese incrementada anualmente en 28  horas co mesmo soldo. Pero é que ademais no novo convenio elévase o número de domingos e festivos a traballar ( de un mínimo de 6 a 9 anuais).

Tamén desaparece como dereito o cobro por traballar en festivos igualando o traballo en domingo ou festivo con calquera outro día da semana non percibíndose   compensación salarial algunha.

 Outro recorte de dereitos é o que afecta ás vacacións xa que se rebaixa o número de días a disfrutar en periodo estival, pasando de 21 a 15 días.

Para os Socialistas de Barbadás é gravísimo que os contratos formativos contemplen un salario aproximado de 450 €/mes introducindo así os “minijobs” no sector

Estamos falando dun convenio que en Barbadás afecta directamente a duas empresas que son Carrefour e C&A que empregan a un bo número de veciños e veciñas do noso concello e que van sofrir un empeoramento considerable das súas condicións laborais e tamén da súa calidade de vida en xeral.

            Falamos dun convenio que é un marco regulador de referencia para todas as actividades comerciais a  nivel estatal, autonómico, provincial e tamén de empresa.

            Por esta razón é un convenio que  terá indirectamente  unha importantísima repercusión en sectores económicos estratéxicos en Barbadás como son os da alimentación, o do textil e por suposto no pequeno comercio en xeral.

            Os Socialistas de Barbadás queremos protexer ós pequenos comerciantes que sempre foron fundamentais na creación de postos de traballo e tamén esiximos manter os dereitos dos traballadores das áreas comercias xa que ambos van estreitamente vencellados: a máis recortes nas condicións laborais nas grandes superficies menores posibilidades  de supervivencia terán os pequeños  comercios.

        Ademais hai que destacar que Barbadás é un concello no que o pequeño comercio desempeña un papel fundamental para facilitar o arraigo dunha poboación nova e que procede en boa parte de outras localidades de provincia.

Por todo o anteriormente exposto, propoño ó Pleno desta Corporación a adopción do seguinte

 

 ACORDO:

ü     Expresar a solidariedade do Concello de Barbadás cos traballadores e traballadoras de grandes almacéns, especialmente os de Carrefour e C&A ubicados no noso municipio.

ü     Estudar medidas para paliar as repercusións  do citado convenio no pequeno comercio de Barbadás.

 

 

En Barbadás a 24 de abril de 2013

 

 Xosé Carlos Valcárcel

Voceiro do Grupo Municipal Socialista de Barbadás