O TENENTE ALCALDE TAMÉN ACUMULA UN ABULTADO PATRIMONIO

O PSdeG DE BARBADÁS ESIXE A DIMISIÓN DO TENENTE ALCALDE POR PRESUNTA VINCULACIÓN CON EMPRESAS CONSTRUTORAS

 

• Manuel García González posúe presuntamente o 30 % dos terreos na área de reparto número 10 onde Mahía/Maexpa tiñan previsto contruir 600 vivendas

 

• O líder socialista, Xosé Carlos Valcárcel, lamenta que “teñamos que falar das ramificación do Emporio Freire” e pide a dimisión do tenente alcalde “por seguirlle os pasos a Freire”

 

 

• Valcárcel: “en lugar de atender os intereses da veciñanza, supostamente utilizaron o seu tempo e a confianza da cidadanía para incrementar espectacularmente o seu patrimonio”.

 

• Segundo os Socialistas “ambos (Freire e García) tiñan tempo para construir torres, pero non para xestionar ou facilitar que o concello de Barbadás teña dotacións e servizos básicos dos que a día de hoxe aínda carece”

 

 

• O PSdeG reclama a intervención do Presidente da Deputación, José Manuel Baltar, para evitar que o 5º concello da provincia apareza nos titulares dos medios de comunicación por asuntos turbios

 

• O Grupo Socialista esixe que Baltar sexa contundente cos 2 dirixentes de Barbadás, tendo en conta que “alardea de honestidade e transparencia na xestión dos asuntos públicos”

 

 

 

Barbadás, 28 de maio 2013.  O tenente alcalde de Barbadás  é propietario de 3.100 metros cadrados nun área de reparto na que o grupo Mahía/Maexpa tiña prevista a construcción, antes da crise económica, de preto de 600 vivendas. Estes datos indican que o tenente alcalde de Barbadás, Manuel García González, ten propiedades nesta zona de expansión onde estaba previsto construir o instituto do 30 % do solo.

            O voceiro socialista reclama a dimisión do alcalde, José Manuel Freire, e do tenente alcalde, Manuel García, “porque queda claro que permitiron que Babadás se convertera na Marbella de Galicia”. Segundo Xosé Carlos Valcárcel “parece ser que existen estreitos vínculos entre empresas construtoras e os máximos dirixentes políticos de Barbadás”.

            Dende o PSdeG de Barbadás son moi críticos ante os novos datos patrimoniais do tenente alcalde de Barbadás. Para Valcárcel esto é un “suma e sigue do serial que no Grupo Municipal Socialista coñecemos como Emporio Freire”. O líder socialista lamenta que “teñamos que falar das ramificación deste emporio”.

            Valcárcel destaca que “estamos a falar das 2 persoas que levan dirixindo dende hai máis de 20 anos o concello de Barbadás”. O voceiro socialista reprocha que tanto Freire coma García “en lugar de atender os intereses da veciñanza, supostamente utilizaron o seu tempo e a confianza da cidadanía para incrementar espectacularmente o seu patrimonio”.

            Os 2 dirixente da política local de Barbadás supostamente teñen propiedades na área de reparto número 10 da Valenzá e en Sanxenxo “ e non cremos que esto sexa unha simple coincidencia”. Ambos os dous patrimonios teñen tamén outras similitudes porque o Emporio Freire ten propiedades nun local onde estaba ubicada a oficina de Maexpa en Barbadás. Pola súa banda o tenente alcalde é o dono do baixo onde se instalou a oficina de Mahía na Valenzá e hai que ter en conta que as 2 empresas pertencen ó mesmo grupo empresarial.

            O tenente alcalde “parece seguirlle os pasos ó rexedor de Barbadás”, sinala Valcárcel. O voceiro do PSdeG refírese á coincidencia de que se trata de “2 políticos clave no concello e que presuntamente se dedicaron a promover desenrolos urbanísticos dos que supostamente eles son beneficiarios”. Xosé Carlos Valcárcel ironiza ó afirmar que “ambos tiñan tempo para construir torres, pero non para xestionar ou facilitar que o concello de Barbadás teña dotacións e servizos básicos dos que a día de hoxe aínda carece (centro de saúde, instituto, centro de día, nova gardería infantil,…)

            No caso de que nin o tenente alcalde nin o rexedor de Barbadás dimitan, dende o Grupo Municipal Socialista demandan a intervención do Presidente da Deputación. José Manuel Baltar pregoa a honestidade e a transparencia nas xestión dos asuntos públicos. Baltar Blanco “fala de rexeneración e honradez, polo tanto non pode permitir que o 5º concello da provincia apareza tan a cotío nos titulares dos medios de comunicación por asuntos turbios que converten as súas plabras en simple papel mollado”.

            O líder socialista sinala que “para que Baltar sexa crible, tanto Freire coma o tenente alcalde, teñen que dimitir e deixar as súas responsabilidades políticas en Barbadás”